17/01/2026 曼聯 vs 曼城

足球資訊 | 英格蘭超級足球聯賽(2025/26) | 發布日期: 16/01/2026

比賽日期	主隊	客隊	主勝機率	和局機率	客勝機率
2026-01-17 20:30	曼聯	曼城	18.8 %	20.3 %	60.9 %

主勝機率	和局機率	客勝機率
18.8%	20.3%	60.9%

排名: 英超(7) vs 英超(2)

2026年突然迎來大球會換帥期，仍然有半季時間爭取更好成績，管理層就唔手軟。艾摩廉高調「搏炒」言論一出，果然求仁得仁唔使再返工。卡域克，蘇斯克查兩位曼聯名宿爭奪一個看守領隊位置，最後前者跑出。卡域克喺曼聯大部份時間喺費格遜麾下，外界期待佢能繼承「曼聯DNA」。佢首場就有重要任務，帶領球隊主場惡鬥同市宿敵曼城，誓要打甩髀。

足總盃出局後，曼聯今個球季將會係100年來最短球季，只踢40場波。3-4-3陣式，隨着艾摩廉離去，似乎唔會再喺曼聯出現。按照Opta統計，卡域克帶領米杜士堡時，超過九成嘅時間都係採用4-2-3-1陣式，而且較少喺賽事中轉換陣式，只會位換位，變陣欠靈活性令佢當時被受批評。但卡域克嘅米杜士堡，當時喺英甲入球，射門，預計入球，喺對手半場成功傳送都係聯賽第一。利用控球在腳嘅踢法去打跨對手，佢自言要令球迷享受足球。大戰當前，隊中首席射手麥比奧莫(Bryan Mbeumo)同迪亞路(Amad Diallo)由非洲國家盃回歸，將能提昇攻力。

對手曼城哥迪奧拿嘅帥位就夠穩陣，足總盃需要停賽，坐喺觀眾席就可以睇住球隊贏埃克塞特十個一皮。剛加盟嘅施曼尤(Antoine Semenyo)一插即用，聯賽未落場，足總盃同聯賽盃都已經有波入。射入致勝入球嘅卓基(Rayan Cherki)狀態亦繼續火熱，呢個入球，更係兩人合作嘅成果。今季英超球隊各項賽事貢獻入球頭四位，新曼城中前場三叉就佔咗三席，係創造力，爆發力，門前殺手嘅三角配合。卓基負責中前場嘅串連，施曼尤提供邊路突破同高強度壓迫，而夏蘭特(Erling Haaland)就有埋門質素同把握力，令今季曼城進攻線更立體。以往單靠夏蘭特食糊，施曼尤嘅加盟，令哥帥陣地之外，亦有條件進行快速反擊，戰術上更靈活。

喺新領隊帶領下，全力出擊嘅曼聯，未知會否出現新帥效應。曼城雖然近三場聯賽都係和波，施曼尤令球隊嘅攻擊力提升到更高層次，剛剛聯賽盃準決賽首回合贏紐卡素，所有賽事13場不敗，曼城作客勢不可擋。

分類:

足球資訊

17/01/2026 曼聯 vs 曼城

分類:

標籤:

關於我們:

快速連結:

聯絡我們: